August 4, 2021

पोखरा फेवातालको जग्गा १६ सय ९२ रोपनी व्यक्तिको नाममा – ताल अब पोखरी जस्तै

काठमाडौं, २० साउन / पर्यटकीय नगरी पोखराको फेवातालको एक हजार ६ सय ९२ रोपनीभन्दा बढी जग्गा विभिन्न व्यक्तिले आफ्नो नाममा दर्ता गरेको खुलासा भएको छ।

फेवातालको अतिक्रमण भएको जग्गा छानबिन गर्न तत्कालीन प्रधानमन्त्री डा. बाबुराम भट्टराई नेतृत्वको सरकारले विश्वप्रकाश लामिछानेको संयोजकत्वमा समिति गठन गरेको थियो। यही समितिको अध्ययनपछि यस्तो तथ्य पत्ता लागेको हो। आजको नागरिक दैनिकमा प्रशान्त लामिछानेले लेखेका छन्।

समितिले करिब ९५० जना व्यक्तिको लालपुर्जा खारेज गर्न सिफारिस गरेको छ। त्यसमध्ये ७ सय जनाको जमिन संरक्षण क्षेत्रभित्र पर्ने समितिका तत्कालीन संयोजक लामिछानेले बताए। व्यक्तिका नाममा दर्ता भएको यो जमिन खारेज गर्न समितिले २०६९ जेठमा सरकारलाई सिफारिस गरे पनि चार वर्ष बितिसक्दा समेत कार्यान्वयन हुन नसकेको लामिछानेको भनाइ छ।

२०३४ सालको नापी हेर्दा अहिले एक हजारभन्दा बढी व्यक्तिले फेवातालको जग्गा आफ्नो नाममा दर्ता गरेको देखिन्छ । व्यक्तिले पानीमुनिको जग्गा समेत आफ्नो नाममा दर्ता गराएका  नापी कर्मचारीबाटै अवैध दर्ता गरिएको पाइएको छ ।

२०१८ सालमा १० वर्गकिलोमिटरमा फैलिएको फेवाताल २०६४ मा केन्द्रीय नापी विभागले गरेको सर्भेअनुसार ४.२० किलोमिटरमा खुम्चिएको छ। बेलैमा सरक्षण नगर्ने हो भने ताल र पोखराको पर्यटन क्षेत्र संकटमा पर्न सक्छ ।

Be the first to comment

Leave a Reply

Your email address will not be published.


*