May 24, 2022

पर्यटक आगमन घट्यो, एक वर्षमा डेढ लाख जना मात्रै

पौष १८ काठमाडौं : २०२१ को जनवरीदेखि डिसेम्बरसम्म एक वर्षको अवधिमा १ लाख ५० हजार ९ सय ६२ जना मात्र पर्यटक नेपाल आगमन भएको नेपाल पर्यटन बोर्डका निर्देशक मणि लामिछानेले जानकारी दिए यो संख्या सन् २०२० को तुलनामा ८० हजार कम हो । सन् २०२० मा २ लाख ३० हजार ८५ जना पर्यटक नेपाल भ्रमणमा आएका थिए ।

सन् २०२० को शुरुवाती महिनाबाट कोरोना भाइरसको महामारी देखिन थालेको थियो । जसले गर्दा सो वर्ष पहिलो साढे एक महिनाको तथ्यांकका आधारमा पर्यटक संख्या बढी देखिएको थियो । सन् २०२० मा भने प्रारम्भबाटै पर्यटक आगमन प्रभावित भएको छ । यसले समग्र वर्षभर पर्यटक आगमन निकै खस्किएको देखिएको छ । कोरोना भाइरसको प्रभाव देखिनु अगाडी सन् २०१९ मा नेपालमा ११ लाख ९७ हजार १ सय ९१ जना पर्यटक आएका थिए ।

कोरोना महामारीको प्रभाव कम हुनु र यात्रा प्रतिवन्ध खुकुलो बन्दै जाँदा वर्षको अन्तिमतिरको महिनामा केही सुधार देखिएको छ । यद्यपी पर्यटकहरुमा पछिल्लो पटक फैलिएको ओमिक्रोनका त्रास स्पष्ट देखिएको छ । नोभेम्बरको तुलनामा डिसेम्बरमा आगमन कम हुनुबाट यस्तो संकेत देखिएको हो ।

कुल पर्यटक आगमन

  • सन् २०१९ : ११ लाख ९७ हजार १ सय ९१
  • सन् २०२० : २ लाख ३० हजार ८५
  • सन् २०२१ : १ लाख ५० हजार ९ सय ६२

कुन महिनामा कति पर्यटक भित्रिए ?

  • जनवरी : ८८७४
  • फेब्रुअरी : ९१४६
  • मार्च : १४९७७
  • अपि्रल : २२४५०
  • मे : १४६८
  • जुन : ११४३
  • जुलाई : २९९१
  • अगष्ट : ५९१७
  • सेप्टेम्बर : ९८९८
  • अक्टोवर : २३२८४
  • नोभेम्बर : २६१३५
  • डिसेम्बर : २४६७९

४३ प्रतिशत हिस्सा भारतीयको, दोस्रो स्थानमा अमेरिकी

नेपालमा हवाई जहाज चढेर आउने सबै भारतीय नागरिकलाई पर्यटक मानिन्छन् । अर्थातः कोरोना कालमा केही दिन नेपालमा रोकिएर तेस्रो मुलुक जान आएका भारतीय कामदार समेत यो सूचीमा समावेश छन् । जसले गर्दा पर्यटकको हिस्सामा भारतीय नागरिकको संख्या ४३ प्रतिशत देखिएको छ ।

सन् २०२१ मा कुल ६४ हजार ६ सय ७३ जना भारतीय पर्यटक नेपाल आएको तथ्यांक छ । यो वर्ष दोस्रो स्थानमा अमेरिकी नागरिक छन् । अमेरिकाबाट कुल २२ हजार ८ सय ५३ जना पर्यटक नेपाल आएका चन् । यो कुल पर्यटक आगमनको १५.१४ प्रतिशत हिस्सा हो ।

तेस्रो स्थानमा रहेको बेलायातबाट ८ हजार ६ सय ८० जना नेपाल आए । चीनबाट ६ हजार १ सय ९६ र बंगलादेशबाट ५ हजार ४४ जना पर्यटक नेपाल आएका छन् ।

कुन मुलुकबाट कति पर्यटक आए ? (प्रमुख पाँच)

  • भारत : ६४६७३
  • अमेरिका : २२८५३
  • बेलायत : ८६८०
  • चीन : ६१९६
  • बंगलादेश : ५०४४

दक्षिण एसियाली मुलुकबाट कति ?

तथ्यांक अनुसार दक्षिण एसियाली मुलुकमा भारत र बंगलादेशबाट आएको उच्च आगमन संख्याले समग्र पर्यटक आगमनमा यस भेगको हिस्सा बढी देखिएको छ । सन् २०२१ मा दक्षिण एसियाली मुलुकबाट ७१ हजार ६ सय १० जना पर्यटक नेपाल आए । यो कुल आगमनको ४७.४४ प्रतिशत हो ।

दक्षिण एसियाभन्दा बाहेकका एसियाली मुलुकबाट एक वर्षमा मात्र ९ हजार ८ सय २५ जना पर्यटक नेपाल आए । यो कुल संख्याको ६.५१ प्रतिशत मात्र हो । यूरोपबाट यस अवधिमा २५ हजार ३ सय ५ जना पर्यटक आएकोमा यो हिस्सा १६.७६ प्रतिशत देखिएको छ । ओसियाना मुलुकबाट २ हजार ५ सय ७१ जना नेपाल आए । यो कुल आगमनको १.७० प्रतिशत हो ।

अमेरिका र क्यानडाबाट २५ हजार २ सय ९१ जना नेपाल आए । यो कुल आगमनको १६.७५ प्रतिशत हो । by onlinekhanar

Be the first to comment

Leave a Reply

Your email address will not be published.


*